Azərbaycan Respublikasının Prezidenti İlham Əliyevin sərəncamı ilə institutun mikrobiologiya və epidemiologiya kafedrasının professoru əməkdar elm xadimi Fərxəndə Əmir qızı Sadıxova “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif olunubdur. Fərxəndə xanım 1991-2018-ci illər ərzində Ə.Əliyev adına Azərbaycan Dövlət Həkimləri təkmilləşmə institutunun mikrobiologiya və epidemiologiya kafedrasının müdiri vəzifəsində çalışmışdır. Professor F.Ə.Sadıxova Amerika Bioqrafiya İnstitutu tərəfindən 2001-ci ilin görkəmli alimi hesab olunmuşdur və məsləhət şurasına üzv seçilmişdir. Professor F.Ə.Sadıxova ölkəmizdə virusoloji poliomielit laboratoriyasının təşkilatçısı və rəhbəri olmuşdur. Professor F.Ə.Sadıxova poliomielit üzrə qlobal proqramın iştirakçısı kimi ÜST tərəfindən «Qızıl» medalla təltif edilmişdir. 2002-ci ilin iyunun 22-də Kopenhagendə ÜST-nin konfrasında Azərbaycan Respublikası poliomielitdən azad ərazi kimi sertifikat almasında Fərxəndə xanımın böyük rolu olmuşdur. Professor F.Ə.Sadıxova Beynəlxalq Elmlər Akademiyasının akademiki, Beynəlxalq Ekoenerji Akademiyasının müxbir üzvü Bioetika üzrə TNK Sədri, Amerika Bioqrafiya İnstitutunun (ABİ) baş tədqiqat-məsləhət şurasının üzvü, Poliovirusların təbii ştamlarının yayılmasının qarşısının alınması üzrə (Konteynment) Milli koordinator, Taun əleyhinə stansiyanın Virusoloji laboratoriyasının rəhbər-məsləhətçisidir.
Azərbaycan Respublikası Prezidentinin 2006-ci il 16 fevral tarixli 1319 nömrəli Sərəncamı ilə Azərbaycan Respublikasının “Əməkdar Elm Xadimi” fəxri adına layiq görülmüşdür.

Azərbaycan Respublikasının Prezidenti İlham Əliyevin sərəncamı ilə institutun hematologiya kafedrasının müdiri, dosent, əməkdar müəllim Elmira Əbdülbağı qızı Qədimova “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif olunub. Elmira xanım 1990-cı ildən kafedra müdiri vəzifəsində çalışır, eyni zamanda Respublika elmi-praktik Hemofiliya mərkəzinin də rəhbəridir. Elmira xanım 20-dən çox xarici ölkədə hematologiya və transfuziologiya sahəsi üzrə elmi konfrans və simpoziumlarında Respublikamızı layiqincə təmsil etmişdir. E.Ə.Qədimovanın elmi, müalicə və tədris fəaliyyəti Respublika Prezidenti tərəfindən yüksək qiymətləndirilmiş və o, 2006-cı ildə Respublikanın “Əməkdar müəllimi”fəxri adına layiq görülmüş, 2007-ci ildə isə “Tərəqqi” medalı ilə təltif edilmişdir. E.Ə.Qədimova institutun ictimai həyatında fəal iştirak edir. O, 2000-ci ildən Ə.Əliyev adına ADHTİ-nin Yeni Azərbaycan Partiyası ilk partiya təşkilatının sədri, Yeni Azərbaycan Partiyası Yasamal rayon təşkilatının Şura üzvüdür.