15-17 may 2018-ci il tarixlərində Rusiyanın Sankt-Peterburq şəhərində Rusiya Stomatoloji Assosiasiyası, Rusiya Parodontologiya Assosiasiyası və Pavlov adına Sankt-Peterburq Dövlət Tibb Universitetinin həmtəşkilatçılığı ilə “Parodontologiyanın seçilmiş məsələləri” mövzusuna həsr olunmuş beynəlxalq konfrans keçirilmişdir. Bu tədbirdə ölkəmizi, təşkilatçılar tərəfindən rəsmi dəvət olunan, Azərbaycan Parodontologiya Cəmiyyətinin prezidenti, Ə.Əliyev adına Azərbaycan Həkimləri Təkmilləşdirmə İnstitutunun stomatologiya və üz-çənə cərrahiyyəsi kafedrasının assistenti, t.ü.f.d. Cavid Əhmədbəyli və Azərbaycan Estetik Stomatologiya Assosiasiyasının sədri, Azərbaycan Tibb Universitetinin terapevtik stomatologiya kafedrasinın dosenti, t.ü.f.d. Ramiz Əhmədbəyli təmsil etmişdilər.
Beynəlxalq konfransda Dr. Cavid Əhmədbəyli “Diş əti çəkilmələrinin müasir cərrahi müalicəsi” mövzusunda məruzə ilə çıxış etmişdir. Həmin məruzə konfrans iştirakçıları tərəfindən böyük maraq ilə qarşılanmışdı və interaktif diskusiyaların aparılması ilə nəticələnmişdir.
Konfransın gedişində Estoniya, Macarıstan və Rusiyanın müxtəlif şəhərlərindən olan məruzəçilər və həmkarlar ilə, həmçinin Pavlov adına Sankt-Peterburq Dövlət Tibb Universitetinin rəsmi ziyarəti sırasında universitetin rəhbərliyi ilə bir çox görüşlər keçirilmişdir. Bu görüşlər sırasında həmin universitet ilə Ə.Əliyev adına Azərbaycan Dövlət Həkimləri Təkmilləşdirmə İnstitutu və Azərbaycan Tibb Universiteti ilə, həmçinin Rusiyə Parodontologiya Assosiasiyası və Azərbaycan Parodontologiya Cəmiyyəti ilə mövcud əlaqələrin inkişafı və perspektiv planları müzakirə edilmişdir. Təşkilatçılara 2018-ci ilin noyabrında Azərbaycan Parodontologiya Cəmiyyəti və Azərbaycan Estetik Stomatologiya Assosiasiyası tərəfindən Bakıda keçiriləcək “EstePerio2018” 3-cü Beynəlxalq Parodontologiya və Estetik Stomatologiya Konqresi haqqında məlumat verilmişdir.