Qanlı 20 Yanvar hadisələrindən 27 il keçir. 1990-cı il yanvarın 19-dan 20-nə keçən gecə, əvvəlcədən fövqəladə vəziyyət elan edilmədən, sovet ordusu Azərbaycana qarşı hərbi əməlliyatlara başladı. Faciə zamanı 137 insan öldürüldü, 744 adam ağır xəsarət aldı, 841 nəfər isə qanunsuz olaraq həbs edildi. Amansızcasına qətlə yetirilənlər arasında beş millətin nümayəndələri, o cümlədən yetkinlik yaşına çatmayan uşaqlar, qadınlar, qocalar, şikəstlər də vardı. Sovet ordusunun əməliyyatları nəticəsində 200 mənzil, ev, şəxsi və dövlət əmlakı dağıdıldı. Bu qanlı hadisələrdən illər keçsə də, xalqımız o müdhiş gecəni daim xatırlayır, bu faciəni törədənlərə öz dərin nifrətini bildirir. Xalqımızın qan yaddaşında əbədi yaşayacaq 20 Yanvar faciəsi Respublikamızda hər il Ümumxalq Hüzn Günü kimi qeyd edilir.
    Yanvarın 19-da Ə.Əliyev adına ADHTİ-nin professor-müəllim heyəti rektor professor N.A.Qasımovun rəhbərliyi ilə 20 Yanvar faciəsi nəticəsində həlak olanların əziz xatirəsini yad etmək üçün Şəhidlər Xiyabanında oldular. Onlar şəhidlərin qəbirlərini ziyarət edib, qərənfillər düzdülər.