2-6 mart 2026-cı il tarixində ABŞ-ın Nyu Orlean şəhərində Amerika Ortopedik Cərrahlar Akademiyasının (AAOS) illik toplantısı keçirildi. Bu toplantı travmatologiya və ortopediya ixtisası üzrə dünyada kecirilən ən mötəbər tədbirlərdən biridir. Hər il olduğu kimi bu il də tədbirə bütün dünya ölkələrindən yüzlərlə mütəxəssislər qatıldı.
İxtisasın tanınmış mütəxəssisləri 5 gün ərzində travmatologiya və ortopediyanın bütün aktual məsələlərini müzakirə etdilər. Canlı əməliyyatlardan başqa, geniş spektrdə mövzuları olan interaktiv seanslar və “Workshop”lar da keçirildi. Toplantıda planlaşdırılan proqram üzrə praktiki bacarıqların inkişaf etdirilməsi, praktikada çətin texnologiyalar müzakirə olundu, fikir mübadiləsi aparıldı və ekspertlərdən öyrənmək imkanları əldə edildi. Bu beş gün ərzində nümayəndələr tərəfindən canlı cərrahiyyə əməliyyatlarına, mürəkkəb klinik hadisə təqdimatlarına, didaktik mühazirələrə baxıldı.
Tədbirdə Ə.Əliyev adına Azərbaycan Dövlət Həkimləri Təkmilləşdirmə İnstitutunun travmatologiya və ortopediya kafedrasının assistenti t.ü.f.d. İnar Seidov da iştirak etdi. O, toplantı cərcivəsində “Süni zəkanın cərrahiyyəyə inteqrasiyası” mövzusunda keçirilən dəyirmi masada ölkəmizdə bu sahədə aparılan işlərin nəticələri haqqında məlumat verdi.