Azərbaycan Respublikasının Prezidenti İlham Əliyevin müvafiq Fərmanına əsasən, Əziz Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) 90 illik yubileyi çərçivəsində bir qrup əməkdaşı dövlət təltifləri ilə mükafatlandırılıb. Prezident Fərmanına əsasən səhiyyə sahəsində uzunmüddətli səmərəli fəaliyyətlərinə görə, institutun əməkdaşları “Tərəqqi” medalı ilə təltif olunublar.
Dövlət təltifləri Səhiyyə naziri tərəfindən təqdim edilib. Təqdimetmə mərasimində çıxış edən nazir bildirib ki, bu mükafatlar Prezident İlham Əliyevin səhiyyə sisteminə və onun işçilərinə göstərdiyi yüksək diqqət və qayğının bariz nümunəsidir.
Nazir qeyd edib ki, 1935-ci ildən fəaliyyət göstərən Ə.Əliyev adına Azərbaycan Dövlət Həkimləri Təkmilləşdirmə İnstitutu milli səhiyyəsinin formalaşmasında mühüm yer tutur.
Təltif olunan əməkdaşlar göstərilən yüksək etimada və dəyərə görə Prezident İlham Əliyevə dərin minnətdarlıqlarını bildiriblər. Onlar bu mükafatın institut kollektivinin birgə əməyinə yüksək qiymətin olduğunu qeyd edərək, gələcəkdə də Azərbaycan səhiyyəsinin inkişafına töhfə verməyə hazır olduqlarını vurğulayıblar.