Səhiyyə sistemində yaranmış tələbatları nəzərə alaraq Ə.Əliyev adına Azərbaycan Dövlət Həkimləri Təkmilləşdirmə İnstitutunda müvafiq kafedraların tədris planlarına artıq təşkil olunmuş Təməl həyat dəstəyi (BLS), Təkmil həyat dəstəyi (ALS) və Təkmil kardiovaskulyar həyat dəstəyi (ACLS) kursları ilə yanaşı Kliniki exokardioqrafiya, Kiçik cərrahi əməliyyatlar, Tibbi tullantıların idarə olunması, Xəstəxana öncəsi travma həyat dəstəyi, Travmalarda təkmil həyat dəstəyi (ATLS), Mamalıqda təkmil həyat dəstəyi (AİSO), Neonatal reanimasiya proqramı (NRP), Təkmil pediatrik həyat dəstəyi (PALS), İnfeksion nəzarət, Mikrobioloji laborator müayinə üçün materiallarla iş, Disstres hallarda psixoloji dəstək, Fövqəladə halların idarə oluunması, Ailə həkiminin işinin təşkili, Laparoskopik cərrahiyyə üsulları, Spirometriya, Elektroensefaloqrafiya, Elektromioqrafiya kimi kurslar daxil edilmişdir.
İnstitutun terapiya kafedrasının bu ilki təqvim planında yer almış “Pulmonologiyada funksional diaqnostika. Spirometriya” mövzusunda növbəti kurs 08.12.2025-12.12.2025-ci il tarixində keçirilmişdir. Kurs zamanı müdavimlərə tənəffüs funksiya testinin istifadə qaydaları və hansı patalogiyalarda daha faydalı olduğu tədris edildi. Bronxial astma, xronik obstruktiv ağciyər xəstəliyi,interstisial ağciyər xəstəlikləri və s. patologiyaların diaqnostikasında, izlənməsində spirometriya testinin əvəzsiz rolu izah olundu.
Kursun praktiki hissəsi Referans Medica Group daxilində pulmonoloq Əsəd Beydullayev tərəfindən tədris olundu və xəstələr üzərində əyani olaraq göstərildi. Sonda müdavimlərin sorğusu aparıldı, keçirilən kursda spirometriyanın mənimsənilməsi barədə rəy verildi.