İstanbulda keçirilən Türkiyə Üz Plastik Cərrahiyyəsi Cəmiyyətinin 19-cu Milli və 4-cü Beynəlxalq Konqresi (YPCD-2025) dünya üzrə tanınmış plastik və rekonstruktiv cərrahların, otorinolarinqoloqların və üz estetikası üzrə mütəxəssislərin bir araya gəldiyi mühüm elmi platforma oldu. Bu nüfuzlu tədbirdə Ə.Əliyev adına Azərbaycan Dövlət Həkimləri Təkmilləşdirmə İnstitutunun otorinolarinqologiya kafedrasının dosenti Məzahir Quliyev ölkəmizi uğurla təmsil etdi. Dosent M.Quliyev konqresdə həm məruzəçi kimi, həm də “Burun zirvəsi-16” panelinin moderatoru kimi iştirak etmişdir.Onun “Piezo osteotomi ilə yapısal stabiliteye innovativ yaklaşımımız”, “Revizyon Rinoplastide Rhino-Graft Tekniği”, “Septum Perforasiyonu onarımında yeni bir yöntem” mövzuları ilə etdiyi elmi məruzələrdə əldə olunmuş uğurlu nəticələr göstərilmişdir. Beləki, hər 3 mövzu üzrə təklif olunmuş müasir və yeni cərrahi metodlar, PubMed-indexli jurnalda bu barədə dərc olunmuş məqalələr, patentini aldığı yeni alətlər təqdim olunmuşdur. Təqdimatlar konqres iştirakçıları tərəfindən yüksək qiymətləndirilmiş, xüsusilə innovativ texnikaların klinik praktikaya gətirdiyi yeniliklər maraqlı müzakirələrə səbəb olmuşdur.
Dosent M.Quliyevin moderatoru olduğu “Burun Zirvəsi-16” panelində aktual problemlər, yeni texniki yanaşmalar və rinoplastikanın gələcək istiqamətləri müzakirə olunmuşdur.
Əməkdaşımızın bu konqresdə fəal iştirakı Ə.Əliyev adına ADHTİ-nin beynəlxalq elmi platformalarda uğurlu təmsil olunmasının və Azərbaycan həkimlərinin otorinolarinqologiya, o cümlədən rinologiya, sahəsində dünya tibb ictimaiyyətində artan nüfuzunun göstəricisidir.