25 noyabr 2016-cı ildə Ə.Əliyev adına Azərbaycan Dövlət Həkimləri Təkmilləşdirmə İnstitutunun Elmi Şurasının növbəti iclası keçirildi.
İclasın əvvəlində institutda yaranmış ənənəyə görə rektor professor N.A.Qasımov institutun dosent elmi adı almış əməkdaşı t.e.d. Mustafayev İsax İsmayıl oğluna AR Prezidenti yanında AAK-nın diplomunu təqdim edərək onu təbrik etdi.
Ə.Əliyev adına ADHTİ-da rezidentlərin hazırlığı haqqında hesabat məsələsi üzrə prorektor t.e.d. Ş.H.Əliyev çıxış edərək bildirdi ki, 2011-2016-cı illər ərzində ümumilikdə Ə.Əliyev adına ADHTİ-na daxil olan rezidentlərin sayı 282 nəfər olmuşdur. Onlardan 45 nəfəri bu tədris ilində qəbul edilmişlər. Hal-hazırda institutda 24 kafedrada 31 ixtisas üzrə rezidentura təhsili alanların ümumi sayı 184 nəfərdir. Qeyd olundu ki,Respublikada cəmi 40 ixtisas üzrə rezidentura təhsili fəaliyyət göstərir.
Sonra prorektor öz çıxışını davam etdirərək bildirdi ki, Səhiyyə Nazirliyinin dəstəyi ilə xarici ölkələrdə rotasiya keçən rezidentlərimizin sayı ildən-ilə artır. Almaniya, Türkiyə, Rusiya və Belarusiyada 75 rezidentimiz rotasiya kurslarında olmuşlar. Ölkə daxilində isə Respublikanın qabaqcıl tibb müəssisələri ilə qarşılıqlı rotasiya kursları təşkil olunmuşdur. Rezidentlərə tibbi təhsil verməkdən əlavə potensialı olanları gələcəyin elmi işçiləri kimi hazırlamaq da qarşıda duran vəzifələrdəndir. 2013-2016-cı illərdə 21 həkim-rezident Azərbaycanda təşkil edilən bir sıra konfranslarda çıxışlar etmiş, məqalələri bir sıra mötəbər tibb jurnallarında çap olunmuşdur. Eyni zamanda 2014-2016-cı illər əzində Ə.Əliyev adına ADHTİ-nin təşkil etdiyi xarici dil kurslarında 100 rezident ingilis dili üzrə kurs keçmiş, müəyyən səviyyələr üzrə imtahan verib diplomlara layiq görülmüşlər.
İnstitutun rektoru professor N.A.Qasımov çıxış edərək Ə.Əliyev adına ADHTİ-nin rezidentura şöbəsinin fəaliyyətini qənaətbəxş saydı və qarşıda duran vəzifələrdən danışdı. O qeyd etdı ki, 2016-cı ildə rezidentura təhsilinin yekun imtahanından 4 nəfər keçməmişdir. Onlardan 2-si imtahandan kəsilmiş, 2-si isə iştirak etməmişdir. Bu məsələyə ciddi reaksiya olmalıdır, onların təhsil aldığı kafedralarla iş daha sıx aparılmalıdır və səbəblər araşdırılmalıdır.
Elmi şuranın gündəliyinin digər məsələsi tədris-metodik sənədlərin müzakirəsi və təsdiqi olmuşdur. Onların müzakirəsindən sonra institutun cari məsələlərinə baxılmışdır. Bununla da Elmi Şura öz işini başa çatdırmışdır.